TURA: North Garo Hills a·jani Kharkutta bazar-o sak 13 manderang COVID-19-ko man·ahani gimin contact tracing ba COVID-19 man·gipa manderang baksa apsan kam ka·rimgipa manderangko porikka ra·e niangkuna gita North Garo Hills a·jani district administration, Kharkutta bazar-ko Mongolbar attam 5:00 bajioni Sukrobar pring 6:00 bajiona chipe donatchengaha.
Kharkutta bazar-ko salgittamna chipe donatahani gimin bazar-o donggipa pilak dokkanrangkon Mongolbar attamonin chipe dontokna nanggen aro Kharkutta bazar-ko chipe donengmiting somoio bazar-ni ning·o donggipa manderang gipin biaprangchi re·ongkatna man·jawa aro gipin biaprangoni manderangba ia bazar ning·ona re·bana man·jawa ine North Garo Hills a·jani Deputy Commissioner u·iataha.
Kharkutta bazar-ko salgittamna chipe donatengmiting somoio maming program ba tom·anirangko ong·atna man·jawa aro ia biapo medical-ni manderang, magistrate-rang, police-rang aro kamko ka·enggipa sorkari official-rangna agrede darangba re·rurana man·jawa ine DC u·iataha.
