RESUBELPARA: COVID-19-ni giproroanichi manderang dingtang dingtang neng·nikanirangko chagrongna nangtokengon, muga jo·ongrangko jilanichi an·tangtangna janggi tangani cholrangko dake ra·skachina gita North Garo Hills a·jani Mendipathar-o India sorkarini Textiles Ministry-ni ning·o donggipa Central Silk Board (CSB) didiataha.
CSB, MESSO P-4 Unit-ni Scientist B aro OIC Mahasankar Majumdar-ni parakatani gitade, ia sal somoirango COVID-19-ni giproroaniko champengna gita sorkari lockdown-rangko aro curfew-rangko ra·gatengani a·sel bang·a manderangan aro mongsongbate salo hajira ka·e cha·enggipa manderang kamgri ong·tokna nange neng·nikanirangko chagrongna nangtokengon manderang muga-ni kamrangko jako ra·e an·tangtangna janggi tangani cholrangko dake ra·na man·gen.
“Meghalaya a·doko muga jo·ongrangko jile muga kildingko tariani aro ba·ra sringe dokani kamrangan ganding chindingrangko tariani kamo nambatgipa karkanarang ong·a indiba Meghalaya a·doko textile industry-rang dongjani gimin muga kildingko tariani aro ba·ra dokani kamrangan ganding chindingrangko tarianio nambatgipa chol ong·enga. Meghalaya sorkario see rakkiani gitade, ba·ra dokani kamrango dol 15,900 nokdangrang aro muga kildingko tarianio dol 16,000 nokdangrang bak ong·paenggiparang ong·a,” ine CSB-ni Scientist parakatenba, muga jo·ongrangko jile kilding tariani kamrangko jako ra·e an·tangtangna janggi tangani cholrangko dake ra·china a·doko songdongenggipa manderangko didiataha.
