TURA: East Garo Hills a·jani song damsaoniko police-rang, ma·sina man·gijagipa bobil dolrangni dongnue donanggipa gulirang aro magazine-rangko man·taiaha ine kobor on·aha.
Police official-rangni u·iatani gitade, iani bidingo koborko man·soa bakan Williamnagar police station-ni officer-in-charge,Special Force (SF-10)-ni sipairang baksa Rapdikgre songona re·angaha aro ia bosturangko Bristibar pringwalni 1:30 bajimango buring damsaoniko man·aha.
Ia songoniko police-rangni man·gipa bosturangara, FN FAL Rifle (SLR)-ni ge 12 magazine aro rong 22 7.7 mm gulirang ong·achim.
Iani bidingo police-rang mokordomako ka·e ning·tue am·sandina a·bachengataha ineba East Garo Hills a·jani police official parakataha.
Batanggimin somoirangoba East Garo Hills a·jani dingtang dingtang biaprangoniko GNLA bobil dolni dongnue donanggipa bang·bea silchidarerangko police-rang man·ahachim ine nikna man·a.
