SHILLONG: Lockdown-mitingo janggi tangna be·enni pal me·su samjakrangko cha·bo ine uni agananina namgija chanchijachina gita Deputy Chief Minister Prestone Tynsong, salsagipao manderangko aganaha.
Ia sajinmaani somoio an·tangtangko nigrikna nanggen, maha maha dake cha·na ringna an·chingo chol dongja ine angni agangipa kattana, mitamrang nang·ni agangipa kattarang namen rakaha ine angko aganenba bang·arangan namgija chanchiaha. Unigimin ka·sapae namgija chanchipanabe” ine Minister aganan baksa, gipin chol dongjani gimin ia kattarangko aganna nangao ga·akaha ineba ua agandapaha.
“Ia kattarangko dal·e ra·nabe, an·ching sakantion daito gnang aro da·sikkario gita ong·gija ia bilsiode cha·anirang chu·onga gitan donga aro altuaen man·iagen,” Pa Tynsong aganaha.
Lockdown-ni somoio be·en bitinni palo me·su samjakrangko cha·e tangskabo ine Pa Tynsong-ni manderangko agangipa kattako bang·an namnikotokjaha aro ra·chakna man·tokjaha.
Unaskang Pa Tynsong indake aganengachim je Ma·mong sorkari ia bilsiode, May aro June jagnina, on·atrongbewalna bate merong mechurangko on·dapataha.
“Kattana, May jao kg 10 man·ode June jaode kg 20 man·skagen aro ian May aro June jagnina ong·gen,” Minister aganaha aro a·doko NFSA-ko man·giparang 21,45,145 donga ineba ua au·iataha.
