TURA: Meghalaya Chief Minister Conrad K. Sangma mni Sukrobar salo Tura DC office-ni DRDA conference hall-o West Garo Hills-o Covid-19 sabisini chu·gimik obostarangni bidingo District Administration aro health department-ni official-rang baksa nipile chanchirimaniko dakangtaiaha.
Uamangni tom·e chanchirimani somoio Deputy Commissioner Ram Singh, a·jao mongsongbate Tura songjinma aro a·kawe jolrango Covid-19 sabisini jelbatrikrikengani bidingo Chief Minister-na talate on·chengaha.
Tura DC-ni parakatani gitade, a·jao aro a·kawe jolrango Covid sabisinina porikka ra·jinmae niani somoio bang·bata manderangon sabisi man·tokahachim.
Ia chu·gimik obostarango pangchake Administration-ni gita a·ja gimikko “chu·gimik curfew”-ko ra·gatangskaaha, jedakode iarangko dakanichisa sabisini saksa sakgipino batrikrikengaoniko dakgrikchakna chol ong·skagen, ineba DC, Chief Minister-na taldapate on·angaha.
Uandake health department-ni official-rang, a·jao covid-19 sabisina dakgrikangkuanio sana-bananio nangchakgipa pilak nanganirang aro nirok-simsake kamko ka·enggipa manderangko nangdapengani bidingo Chief Minister-na parake on·angskaaha.
Apsandake, Garo Hills i/c Health Department-ni Joint Director, Dr. Meenakshi A Sangma-ba, West Garo Hills a·jao covid man·gipa bang·batrikrikengani gimin Tura Civil Hospital-o sana-bananio kamko ka·enggipa manderangko nangdapengani bidingoba Chief Minister-o janapjolaha ineba koborna u·iataha.
Chief Minister Conrad K. Sangma-ni parakatani gitade, Directorate of Health Services, Shillong-ni official-rang sabisini obostarangko nirok-simsakani bak gita sana-bananio pilak nangchapgiparangko aro nirok-simsake kamko ka·enggipa manderangko nangdapani bidingo Garo Hills-ona re·bae obostarangko nirokangskagen ine parakaha.
