TURA: West Garo Hills a·jaoba re·baenggipa June 1 tarikona kingking chu·gimik curfew-ko ra·gatmanahani gimin curfew-ni somoirango manderang, an·tangtangni nangchongmotgipa cha·ani ringani bosturangko brena man·na gita nangchongmotgipa bosturang, jekai mirong, dal, me·su, be·en aro uandakgipa dokkanrangko Sombar, Budbar aro Sukrobar salrango pring 8:00 bajioni attam 1:00 bajiona kulina man·gen ine West Garo Hills a·jani Deputy Commissioner u·iataha.
Deputy Commissioner-ni u·iatani gitade, Tura jillao dingtang dingtang gittimni seokgimin dokkanrangsan ia salrango kulina man·aigen indiba West Garo Hills a·jani gipin biaprangode galamal, me·su aro be·en palgiparangba kulina man·aigen.
Manderangni nangchongmotgipa bosturangko retailer-rang Sombar, Budbar aro Sukrobar salrango pring 5:00 bajioni pring 9:00 bajiona wholesaler-rangoniko ra·ena man·gen aro ia wholesaler-rangko Supply office-ni gita seoke manderangna u·iatgen.
Curfew-ni somoio gari gorarang nangchongmotana agre re·rurana man·jawa indiba curfew-ni somoio nangchongmotgipa bosturangko salbaenggipa garirang, Tura jillao manderangni nokona bosturangko sokate on·enggipa garirang, 1917 dolni garirang, medical, police aro uandake nangchongmota kamrangko ka·enggipa dolrangkode champengani dongjawa ine DC u·iataha.