TURA: COVID-19-ni test-ko ka·na jechakgipa mande saksa Sombar salo, South Garo Hills a·jani song damsao siangaha ine kobor on·aha.
Kobor on·timgiparangni u·iatani gitade, re·anggipa antio South Garo Hills a·jani Mengkulgittim jolo donggipa Rongsa Awe songo mande saksa COVID man·ahani gimin ia songo manderangni re·ruraanirangko champengate songni manderangko COVID-na porikka ra·e niengmiting somoio ia bilsi 40 ong·gipa mandede an·tangko porikka ra·na jechakahachim.
Indake ong·engon, ia mande Sombar salo siangaha aro ja·mano ia mandeni manggisiko COVID-19-na porikka ra·e nion uko positive man·aha ine South Garo Hills a·jani doctor-rang parakataha.
Ja·mano ia songona magistrate aro police-rang re·bae dongimin niam gita uni manggisiko gopna ra·angaha ine kobor on·aha.
Sombar salo sianggipa mandeko channa da·o South Garo Hills a·jao COVID man·e sianggiparang gimik sakbri gapengaha ine official-rang u·iataha.