TURA: Garo Hills Autonomous District Council (GHADC)-o kam ka·enggipa manderangni man·na nangkuenggipa dormaharangko 5th Pay Commission-ni recommendation-o pangchake on·china gita GHADC-ni sak 11 Congress MDC-rang, chief executive membor Benedic R Marak-chi dilenggipa executive committee-o dabiangaha.
Iani bidingo GHADC-ni CEM Benedic R Marak-na sedoatengon, GHADC-o kam ka·giparangni dormaharangko gital payscale-on on·na gita gitcham executive committee resolution-ko pass ka·manahani gimin da·o gital executive committee-ba kam ka·giparangna gital payscale-osa dormaharangko on·na nanga ine Congress MDC dabiangtokaha.
“GHADC-o kam ka·giparangni man·na nangkuenggipa dormaharangko ta·raken on·na man·na gita chief minister baksa agangrike kamko ka·china chinga nang·ko didienga,” ine Congress MDC-rang, GHADC-ni CEM-na seatgipa chittio parakataha.
Indake ong·engon, 15th Finance Commission-ni ning·o GHADC-na chamatenggipa gong kror 91 tangkarangko sorkari, Jal Jeevan Mission-ni kamrangna jakkalsochengna miksongenga ine koborrangko man·soaha ineba Congress MDC-rang matnangataha.
“GHADC-oba water supply aro sanitation-ni kamrangna dingtang kamko ka·gipa department donge, batanggimin bilsirangonin kamko ka·enga. Finance Commission-ni dongimin niam gitade, district council-rangna chamatgipa tangka paisarangko songko nokko re·dilenggipa dolrangsa jakkalna bil donga aro iandake tangka paisarangko gipin kamna jakkalna ja·ku de·aniko chinga raken jegalenga. Uni gimin GHADC-na miksonge chamatgipa tangka paisarangko GHADC-nasa on·china gita chief minister baksa agangrikchina chinga didienga,” ine Congress MDC-rang parakataha.
