SHILLONG: Meghalaya a·doko songdongenggipa manderang sorkarini dongimin niamrangko manie, lockdown-ni somoio noktangtango nape dongtokgenchimode antisani gisepon kenbegnigipa COVID-19-ko chena man·gen ine Health department-ni Principal Secretary Sampath Kumar parakataha.
Iani bidingo kobor ra·timgipa manderang baksa agangrikengon, mandeni be·eno corona jo·ongrang salbongaoni salsnimangnasan dongrongaiani gimin manderang antisana noktango dongengmiting somoioba pilak niamrangko ja·rikgenchimode aro an·tangtangna simsakgenchimode saksa sakgipinona sabisi batrikrikaniko champengna man·aigen ine Kumar parakataha.
Meghalaya a·doko salantian COVID-ko man·giparang batrorobaengahani gimin a·doko sabisini batrikrikaniko champengna man·na gita a·dokni Health official, ia kattarangko aganaha.
Shillong songjinmao songdongenggipa bang·bata manderang ia sal somoirango sorkarini dongimin niamrangko manitokengani gimin mittelpilangengon, noko dongengmiting somoirangoba mask-rangko ganchina aro gipin niamrangko ja·rikangkuchina gita Kumar, a·doko songdongenggipa manderangko mol·molataha.
Meghalaya a·doko COVID man·giparangoni 80 percent-mangni gitade maming chin donggija man·giparangsa ong·aia aro 5 percent-mangni gitasan bilongbatenggiparang ong·a ine talatangengon, Meghalaya a·doko sabisi giproroengahani gimin mande sakantikon an·tangtangko chin gri sabisi man·aha ine ra·china sorkari official didiataha.
Meghalaya a·doko manderang mask gananiko dontonggenchimode aro niamrangko manitokjagenchimode da·o sabisi man·giparang bang·batenggnokchim ineba Kumar parakataha.
