AMPATI: Budbar salo, Tura-ni MP Agatha K Sangma, North Tura-ni MLA Thomas A Sangma baksa South West Garo Hills a·jani Ampati Civil Hospital-ona re·ange hospital-o rikenggipa central oxygen supply line-ko nieaha.
South West Garo Hills a·jaoba COVID-19 man·giparang batrorobaengani gimin manderangna nangchongmotenggipa oxygen-ko chu·onga gita man·na ia central oxygen supply line-ko Ampati Civil Hospital-o rikengahachim ine nikna man·a.
Ampati-ona re·angani somoio Tura-ni MP, South West Garo Hills a·jani Deputy Commissioner Ch Ramakrishna, a·jani SP Siddharth Ambedkar, Ampati Civil Hospital-ni Medical Superintendent Dr JS Momin aro hospital-ni gipin doctor-rang baksaba tom·e COVID-19-na tarisamsoanirangko nipilangjolaha.
Badita sak manderangko hospital-o admit ka·aha, badita sak manderang oxygen-ko nangenga, badita ge palangrang oxygen donga, badita ge ICU palangrang donga, hospital-o chu·onga gita oxygen cylinder-rang, oxygen concentrator-rang aro oxygen palangrang dongama dongja, samrang chu·onga gita dongama dongja, uarangni bidingo Tura-ni MP, South West Garo Hills a·jani official-rango sing·sandie ra·angaha.
Ia tom·anio South West Garo Hills a·jani official-rang, Tura-ni MP-na agan-talate on·angskaengon, da·o dipet Ampati Civil Hospital-o ge 70 B type cylinder-rang, ge 13 D type cylinder-rang, ge 20 oxygen concentrator-rang baksana COVID isolation ward-oba ge sku oxygen palangrang donga ine parake on·angaha. Iana agreba, nanggitan somoirangona ge 15 oxygen palangrang aro ge 3 ICU palangrangko tarie donengan baksana doctor aro nurse-rangnaba internet gita ICU training-ko on·enga ine Tura-ni MP-na talate on·angaha.
Ampati Civil hospital-na anaesthetist saksa, ganaecologist saksa aro paediatrician saksa baksana X-ray building-ko dingtang aro hospital-na ambulance-ko on·dapatchina gitaba Ampati Civil Hospital-ni official-rang, Tura-ni MP-ko didiataha.
South West Garo Hills a·jao COVID man·giparangni bidingo a·jani Deputy Commissioner, Tura-ni MP-na talate on·angskaengon, da·o dipet SWGH a·jao gimik sak 739 manderang COVID-19-ko man·aha indiba ianoni sak 370-de nampilaha ine parakataha.
COVID-ni kamrangna kam ka·giparangko nangdapengani giminba ia tom·anio Deputy Commissioner, Tura-ni MP-na u·iataha.
Indake ong·engon, South West Garo Hills a·jani district administration aro medical dolrangna ua man·a dipet dakchakanirangko on·gen aro ambulance-koba ta·raken on·atgen ine Tura-ni MP ku·rachakaniko on·angaha.