SHILLONG: Re·anggipa Bristibar salo, Garo Hills Autonomous District Council (GHADC)-ni officer-rangko jingjengatenggipa manderangni champengna jotton ka·anio officer saksa garitangko sale katna nanganichi me·chik saksa saknaaniko man·na nangahani gimin aro ia ong·anggipa a·selna NPP-chi dilenggipa MDA sorkari, suk ong·gijaniko parakataha.
Ia a·selni bidingo GHADC-ni official-rang, Non Gazetted Employees Association (NGEA)-ni kosako FIR ka·doangahachim aro uchi NGEA-ba gariko sale katenba me·chik saksako saknaatahani gimin gari sale katgipa officer-rangni kosako FIR ka·doangskaahachim.
Ia a·selni bidingo MDA-na ku·wattimgipa aro NPP-ni dilgipa James K Sangma, an·tangni suk ong·gijaniko parakatengon, GHADC-o kam ka·enggiparangni neng·nikanirangko namatna gita gital executive committee jotton ka·engachim indiba iandake kam ka·enggipa officer-rangko champenganiara namen kragijani ong·aha ine parakataha.
“Officer-rangni office-ona re·ange kamrangko ka·aniara GHADC-o man·enggipa neng·nikanirangko namatna ja·ku de·chakatanian ong·engachim indiba kam ka·enggipa officer-rangko champenganiara namen kragijani ong·a aro iandakgipa kamrangchide maming namgniko ra·bana man·jawa,” ine Sangma parakataha.
Gital executive committee baksa bakrimanichisa neng·nikanirangkode namatna man·gen ine jingjengatanirangko dontongchina GHADC-o kam ka·enggiparangko mol·molatengon, iandake officer-rangni kam ka·anirangko champenggenchimode gital EC-ni kamrangko champengani gitasa ong·aigen aro maming namdapaniko ra·bana man·jawa ine NPP-ni dilgipa parakataha.
GHADC-o kam ka·enggiparangni dormaharangko on·na man·na gita GHADC-ni gital EC, sorkari baksa agangrikjringenga ine janapatengon, pilakni gitan nangrime kamko ka·genchimosa namgipa bitekode ra·bana man·gen ine MDA-ni ku·wattimgipa parakataha.
GHADC-o kam ka·enggipa manderangni neng·nikanirangko ua ma·sichakenga ine janapatengon, indita jarangni dormaharangko man·jae uamang nokdangtangtangko chalaianio neng·nikanirangko man·engani giminsa an·tangtangni man·gnirangko dabienga indiba iandake jingjengatanirangko dakanichide maming namgnirangko ra·bana man·jawa aro cholko sandianio pilakan bakrimna nanggen ine Sangma parakataha.
