TURA: Re·anggipa Bristibar salo Garo Hills Autonomous District Council (GHADC)-o kam ka·enggipa officer-rangni kam matchote noktangtangchi re·pilangengmiting somoio, rama champenge officer-rangko ka·mikkenataha ine matnangenba, Non Gazetted Employees Association (NGEA)-ni kosako GHADC-ni Principal Secretary HA Sangma, FIR ka·doangaha.
Ia a·sel ong·ani apsan salon GHADC-ni official, Tura police station-o FIR ka·doangaha aro FIR-o ua NGEA-ni dilgiparang, chong·motan, NGEA-ni secretary Brithen M Sangma, president Senora Johny Arengh, joint secretary Flaming B Marak, adviser Balseng M Sangma, membor Chris Jenny Ch Marak, membor Tengsmey Sangma, membor Sengmilla Ch Momin aro NGEA-ni sakgipin membor Henyvirth Marak-ni bimingko ra·e badi ka·doangaha.
“NGEA-ni neng·nikanirangko ma·sichake ia gital executive committee, changni chang uamang baksa agangrike namatna jotton ka·ahachim aro uamangna jabongani dormaharangko on·na ku·rachake uamangko kam ka·piltaichina mol·molon uamangoni bang·batan kamrangko ka·pilna ku·chaktokahachim,” ine GHADC-ni principal secretary, FIR-o parakataha.
Kam ka·giparangna jabongani dormaharangko on·na ku·rachakahani giminsa treasury-o nangchakegipa officer-rang aro gipin staff-rangde EC-ni ge·etaniko man·e, paybill-rangko tarina office-ona re·baengachim indiba Bristibar salo, officer-rang aro gipin staff-rang kamtangtangoni re·pilangengmiting somoio jingjengatenggipa NGEA-ni membor-rang, niam gri officer-rangni garirangko champengsoaha ine GHADC-ni official parakataha.
GHADC-ni accounts officer saksako jingjengatenggipa NGEA-ni membor-rang, rama champengsoe ka·mikkenatanirangko man·ahani gimin ua garitangko sale katon, uamang uni garikoba ro·ongrangchi goaha ineba FIR-o janapataha.
Curfew-ni somoio NGEA-ni jingjengatanirangko dakaniara Meghalaya Epidemic Diseases COVID-19 Regulations 2020-ko pe·ani ong·enga ineba GHADC-ni sedoatgipa FIR-o janapaha.