SHILLONG: Meghalaya a·doko ia sal somoirangni gisepo Covid-19 sabisina bangËa neng·nikanirangko chagrongengon, a·dokni dingtang dingtang bakrango manderangni an·seng-baljokanina an·tangtangko on·kange aro sabisina mikkangchake kamko ka·enggipa ASHA-rangna uamangni kamni kri betonrangko on·skachina ine Nongpoh-ni MLA, Mayralborn Syiem, a·dok sorkariko didiataha.
Syiem-ni parakani gitade, a·doko ba district-oba ong·china ia sabisini somoio an·tangtangna chanchipilgija songsalni namgnina sagiparangko nirok-simsakachi dangdike on·enggipa ASHA-o kam ka·giparangna dingtangmancha tangka-paisarangko on·skana nanga.
“ASHA kam ka·giparangna, uamangni gipin man·gnirangko on·an baksaba, dingtangmancha sakprakna jao gong 5000/- kae on·dapna nangchongmota. Maina uamang covid sabisi man·a an·tangtangan jajrengbena nanggenchimoba, aro pilak neng·nikanirangko ma·sieba, an·tangtangni janggirangko on·kangpile sabisina mikkangchake songsalni namgnina kam ka·e on·chi dangdikenggiparang ong·chongmota,” ineba Siyem parakaha.
Uni parakangkuani gitade, an·tangtangko on·kange rakbegipa kamrangko ka·enggipa ASHA-rangara dam dongja gita ong·skaenga. Uarangna agreba, uamang an·tangtangani kamni kri man·a nanggnirangko mangmangba man·skajae, nokdangko challaianio namen neng·nikanirangko chagrongengachim.
Indake ong·engon, iarangko nirok-sandie kamko ka·na a·bachengskachina aro ASHA-rangni jekon man·a nangkuenggipa betonrangko aro gipin man·gnirang baksa kamni kri krae on·skachina gitaba Nongpoh-ni MLA sorkario dabiangkuaha.
Iarangko dakanichi ASHA kamko ka·enggiparang A·dokni dingtang dingtang district ba bakrango kamko nambate ka·angskana dakchakani ong·gen ineba ua agandapaha.
