CM, GHADC-ni membor-rang baksa da·o ong·enggipa obostarangni bidingo chanchirima

SHILLONG: GHADC-o kam ka·giparangna bilsi gittam gapnasipile dormaha on·a man·jaenganian NPP-chi rikdilenggipa MDA sorkarina namen neng·nikani sokengon, skangoni da·alona kingking ong·enggipa obostarangko namatani pangkamgipa cholrangko sandianian a·dok sorkarina aro GHADC-ko challaienggiparang sakantini mongsonggipa daito ga·akskaenga.
GHADC-o kam ka·giparangna skangoni dormaha on·a man·jaengani gimin NGEA-ni jegale jingjengatenganiko man·e bang·a neng·nikanirang sokengon, batanggimin sal somoirangoni namatna man·gijagipa obostarangko namaona ra·bana gita cholko sandina ine mejal Sonibaro a·dokni skotong minister Pa, Conrad K. Sangma-ni dilachi GHADC-ni CEM, Deputy CEM, finance department-ni official-rang, aro a·dokni Chief Secretary baksa apsan tom·e chanchirimaniko dakangaha ine koborna u·iataha.
A·dokni Skotong Minister, Conrad Sangma-ni kobor ra·timgiparangna aganengon, a·dok sorkari, je cholrangchiba ama dipet tangka-paisa dongjaenganichi neng·nikaniko chagrongenggipa  GHADC-na dakchakanirangko on·gen aro GHADC-ni gita a·dok sorkarina tangka-paisani bidingo janape sedoatna tariskachina aro uamangni lekka sedoatgipao pangchake sorkarini dingtang dingtang department-rang nigrike kamrangko ka·angskagen ine parakataha.
“Council-ara autonomous body, chong·motan jakgitelgipa bimang ong·a aro uo kam ka·anirang aro tangka-paisani gitaba darang baksa bak donggijagipa (jakgitelgipa) ong·a ine darangan u·ie ra·na nanggen. District Council-rangara a·dok sorkari baksa bak nangeja aro gimik dakgipa kam ba neng·nikanirangkoba council-an namatna nanggen, indiba chinga ama dipet uamangna dakchakanirangko on·skagen,” ine Sangma ku·rachakaha.
Koboro janapani gitade, Council-o kam ka·giparangna bilsi 3 gapnasipile dormaharangko on·kujaengani gimin, kam ka·giparangni man·gnigipa dormaharangko on·china ine Garo Hills Autonomous District Council (GHADC)-ni MDC-rang adita salrangna skangon mangmang Council-ni Chief Executive Member (CEM), Benedic R. Marak-na sedoangaha.
Uandake, a·dokni Chief Minister-ba ru·utgija salsangna skangon, council-ni obostarangko namatani cholko ra·bana man·a gita uo kam ka·gipa manderang aro Executive Committee-ko apsan ba ku·cholsan kamrangko ka·china gitaba didiatahachim.
Indake ong·engon, re·anggipa Bristibar attamo dormaha man·jaengani gimin jingjengatenggipa NGEA-ni membor-rang, council-ni a·tilao kam ka·e re·bapilgipa official-rangni gariko rama champenge jingjengatanichi adita so·so jengjeng ong·arangko nikna man·skaaha.
Iani bidingo Sangma kobor ra·timgiparangna aganengon, “Mitam manderang council-ona re·bae kamko ka·na sikgiparang donga, jegale jingjengatna nangnika ong·ode uamangna biap aro somoi dingtang donga. Indiba uamangni council-o kam ka·anirangko dondipatanide kragipa kam ba orto ong·ja,” ine ua parakaha.
“Indakgipa ong·gija kamrangko ka·angkugenchimode uamango maiba dingtang dake miksongani donga ine an·tangtangko mesokani ong·skaenga. Unigimin manderangni namgija chanchianirangko galchengna nanggen aro mamlako namatna man·gen ingipa ka·dongani gisik dongna nangchongmotgen,” ine Sangma agandapaha.