SHILLONG: Meghalaya a·dokni napram-ong·katram cholgugarangoni sket-changket dakkamaigipa Ri Bhoi district-ni ning·o ga·akgipa Umling-ni napram-ong·katram cholgugako namen challaienga, aro una agreba, East Jaintia Hills-ni Ratacherra cholgugakoba office-ni gita jako ra·nasiengjok ine koborna u·iataha.
East Jaintia Hills district-ni saksa police official-ni parakani gitade, Meghalaya a·dokona napbagipa aro a·dokoni re·angpilenggipa manderang sakantini gimin chu·gimikko ma·sina gita tale-roke serikaniko dakangenga.
Ratacherra cholgugani official saksani parakani gitade, ia sal somoirango covid sabisini obostarang namjaengani somoio Meghalaya a·dokona napbae re·angpilgiparang bang·batan Ri Bhoi district-o donggipa Umling cholguga gitasa napbatokahachim.
Indake ong·engon, uamangni a·dokona napbachengon cholgugao donggipa police dolrang, uamangni chu·gimik biming sea gnanggipa lekka-patrorangko on·atjolengachim, aro uamangni ong·katangpilani ja·manoba je cholguga gita re·ongkatangengachim ua apsan lekkarangko mesokangskaenga, ine official koborna parakaha.
Koboro janapani gitade, Meghalaya a·dokona Ratachera cholguga gita sak 20 mang gitasan napbadokaiaha, aro uamangoni bang·batan gari salgipa (driver)-rangsan ong·achim ineba u·iataha.
“Chinga Meghalaya a·dokona napbaenggipa sakantikon sabisina porikka ra·e nirongenga,” ineba official parakataha.
Apsandake, a·dokona napbaenggipa aro ong·katangenggipa sakantikon police dolrang tale-roke serike rakkienga ineba official agandapaha.
