TURA: Garo Hills Autonomous District Council (GHADC)-o HA Sangma-ko principal secretary dake donaniara niamni a·palo ong·enga ine Non Gazetted Employees Association (NGEA) parakatenba, uko kamoniko ra·galchina gita dabiangaha.
NGEA-ni parakatani gitade, GHADC-ni principal secretary ong·e kamko ka·enggipa HA Sangma, 2021 bilsini April jaon kamoni neng·takani ong·ahachim indiba da·alona kingkingan ua principal secretary ong·e kamko jako ra·engkuachim.
“Kamoni neng·takna somoi ong·aoni changgittamna kingking maming niam gri Sangma-ni kamko ra·dodape donengkua aro ian niamni a·palo ong·enga,” ine NGEA-ni joint secretary Flaming B Marak parakatenba, Sangma-ko ta·raken kamoniko ra·galchina dabiangaha.
NGEA-ni kosako FIR ka·doani giminba NGEA-ni dilgiparang, Sangma-ko raken jegalataha aro ua an·tangsa GHADC-o kam ka·enggiparangko aro NGEA-ni dilgiparangko, 5th Meghalaya Pay Commission-ni recommendation-o pangchake dormaharangko on·na dabichina didiaha ine parakataha.
“GHADC-o kam ka·enggiparang aro NGEA-ni dilgiparang uni ku·pattiani gitasa chingni man·na nangenggipa dormaharangko gital pay scale-o on·china dabiengachim indiba da·o ua an·tangan chingni kosako FIR ka·pangpilskaaha. Ia pilakan uni an·tangna chanchianikosan aro chingni kosako tol·e matnangna jotton ka·aniko mesokani ong·enga,” ine NGEA-ni joint secretary parakatenba, uko ta·raken kamoniko ra·galchina dabiangaha.
Re·anggipa Bristibar salo, GHADC-ni officer-rangko rama champengahani gimin GHADC-ni principal secretary HA Sangma, NGEA-ko dilenggipa adita manderangni bimingko ra·enba, Tura police station-o FIR ka·ahachim ine nikna man·a.
A·palni manderangko GHADC-ona rimbae kam ka·atenga ineba NGEA, GHADC-ni principal secretary HA Sangma-ko matnangataha.
“A·palni manderangko maming niam gri ia officer-rangan GHADC-ni janggil gita office-ona rimbae kamrangko ka·atenga. Mai niamo pangchake uamang a·palni manderangko GHADC-ona rimbae kamrangko ka·atna man·a?” ine NGEA-ni joint secretary sing·doangaha.
2015-16 bilsio Special Assistance scheme-ni ning·o ma·mong sorkarini GHADC-na chamatgipa gong kror 100.71 tangkarangni bidingo janapatengon, ia project-rangko bilsignini gisepon, chong·motan 2015-16 bilsion matchotatna niamko donahachim indiba bang·bata project-rangkon da·ona kingkingan matchotatchipgija donenga ine NGEA matnangataha.
“Bang·bata project-rangon contractor-rang ba MDC-rang 60 percent-kode oke 40 percent-ni giminde maming kobor dongchipjaha. Ia project-rangni pilak nangchongmotgipa lekka aro cheque-rangoba HA Sangma an·tangan soi ka·ahani gimin ia bangki 40 percent-ni giminba ua tale ma·sina nanga,” ine NGEA-ni joint secretary parakataha.
An·tangtangni man·gnina jingjengatenggipa bang·bata employee-rangan grade B, C aro D-rangsa ong·ani gimin GHADC-ni principal secretary ong·e kamko ka·enggipa HA Sangma, sinjetaniko on·na jotton ka·enga ineba NGEA matnangataha.
