SHILLONG: Meghalaya a·doko COVID-19 sabisioni nampilgiparang namen ta·rakengjok aro da·alming salgittamna joljol sabisi man·giparangna bate sabisioni nampilgiparangan bang·batroroengaha.
Mijal Sombar salni bako sak 408 manderang sabisioni nampilaha, unomitingo sak 977 manderang sabisioni nampilskaaha, indakoba mijal salo sak 14 manderang COVID man·e siangdapaha.
Sombar salo sak 408 COVID sabisiko man·dapgiparangonin East Khasi Hills-o sak 272, Ri-Bhoio sak 48, West Jaintia Hills-o sak 31, West Garo Hills-o sak 23, East Jaintia Hills-o sak 13, North Garo Hills-o sak 9, West Khasi Hills-o sak 4, South West Garo Hills-o sak 3, East Garo Hills-o sak 2, East Garo Hills-o sak 2, South Garo Hills-oni sak 2 aro South West Khasi Hills-oni saksa COVID man·dapaha.
Indake apsan somoini bakon, sak 977 COVID man·giparang nampilskaa, uamangoni East Khasi Hills-o sak 519, Ri-Bhoio sak 278, West Garo Hills-o sak 55, North Garo Hills-o sak 31, East Jaintia Hills-o sak 28, South West Garo Hills-o sak 23, South West Khasi Hills-o sak 13, West Khasi Hills-o sak 11, East Garo Hills-o sak 10 aro South Garo Hills-o sak 9 manderang sabisioni nampilaha.
Indake ong·genchimoba COVID man·e sianggiparang salantian uanbaibai dakengkua, jeon mijaloba sak 14 manderang uamangni ianggirangko COVID sabisio gimaattaiaha. Uamangoni East Khasi Hills-oni sak 9, Ri-Bhoio sak 2, South West Garo Hills, West Jaintia Hills aro South West Khasi Hills district-rango sakprak dake siangtaiaha.
A·doko COVID-oni nampilgiparang salantian bang·engahani gimin sabisi man·e donggiparang aditan komiangengaha aro da·o sak 6,913-ona tang·onangaha. A·doko COVID man·giparang sak 35,598 gapahachim, jeon sak 28107 sabisioni nampilaha, sak 578 manderang siangaha.
