SHILLONG: East Jaintia Hills-ni Umpleng jolo galchipe dongipa koela a·doko mija May 29 tariko Assamni sakbonga kam ka·e cha·giparang a·sel ong·e siaha ine Meghalaya Home Minister, Lahkmen Rymbui aganaha.
Rymbui-ni Sombaro koborni manderangna aganani gitade, East Jaintia Hills-ni koela a·doko Assamni sakbonga manderang a·sel ong·e siaha ingipa koborrangko East Jaintia Hills SP Jagpal Singh Dhanoa-na Assam Silchar-ni SP-sa phone ka·enba aganatpilahachim.
Indake kobor man·a joljolan koborrang baditana kakke ong·achim sandie nieaha ineba ua aganaha.
“Je biapon a·sel ong·aha ine koborko man·achim, mikkarang dontongpilgija waani gimin chel·chakgipa dol re·ange niena gita man·ningjahachim. Ian galchipgimin koela a·dam ong·a, jeonikon ru·uta somoirangnan koela bikotjahachim. Haida uamang koela bikottaina ine biaprangko rongtalatnasa re·angahachimkon ine nikatna man·a,” Home Minister aganaha.
Unomitngo sing·sandianiko dakna gita koelaa·damni nokgipa gitam K. Chyrmang-ko police rim·aha ineba Minister aganaha.
Uni aganani gita, Covid protocol-ko ja·rikna nangengani gimin, sing·sandianiko dakna skangba koela a·damni nokgipa gitchamko Covid test ka·chengna ga·akaha, jeko test ka·on positive man·ahachim.
Indake ong·engon, koela a·damni nokgipa gitcham Covid positice ong·ani gimin uko Khliehriat-ni corona care centre-o donataha, uni gimin uo sing·sandianiko dakna gita police-na engtojaha aro uni quarantine daka sal 10 ja·mansa sing·sandina man·aignok ineba Minister aganaha.
Unomitingo, a·sel ong·anio jak dongna nanga ine potchipako man·enggipa mande a·jolni Sordar, Nizam Ali kate dongenga.
Indake ong·genchimoba, “kate dongenggipa Sordar-ko rim·na gita police jotton ka·enga. Unigisepon, Chyrmang aro kate dongenggipa Sordar-o police-ni sing·sandina man·jokosa a·sel chong·motko ma·sina man·aignok” ine Home Minister Lahkem Rimbui aganaha.
