RESUBELPARA: Meghalaya aro Assam a·dokoba COVID-19 batrikrikengani gimin sabisini batrikrikaniko champengna gita North Garo Hills a·jaoba May 31 tarik attam 5:30 bajioni a·bachenge pring 6:00 bajiona walantian night ba walni curfew-ko ra·gataha ine North Garo Hills a·jani Deputy Commissioner RP Marak u·iataha.
Walni curfew-ko ra·gatanio manderang skatang nokoni ong·katna man·jawa, gari gorarangba re·rurana man·jawa aro dokkanrangkoba dongimin somoina bate kulina man·jawa ine u·iataha.
Curfew-ni somoio FCI, gas cylinder, oil tanker, ambulance, medical emergency service, fire & emergency service, security force, police, medical staff aro executive magistrate-rangni re·ruraanikode champengani dongjawa ineba u·iataha.
Indake ong·engon, me·su-samjak, biterang aro uandake nosto ong·ninggipa bosturangkode pring 8:00 bajioni attam 4:00 bajiona kulina on·gnok indiba gipin dokkanrangkode a·bachengo sualatgimin somoi gitan, chong·motan pring 8:00 bajioni salni 12:00 bajiona aro 12:00 bajioni attam 4:00 bajionasan kulina on·angkugen ine North Garo Hills a·jani Deputy Commissioner u·iataha.