SHILLONG: Mikkarang jimbee waengani a·sel Robibar attam dipet East Jaintia Hills a·jani koela a·kolo gimagipa manderangko sandina man·kujaenga ine official-rang parakataha.
Robibar salo, Umpleng jolo donggipa Sutnga Elaka-ni koela a·damo dynamite gopretani ja·man rang·san chirang koela a·kolo napangahani a·sel koela a·kolo kam ka·enggipa mande sakbonga gimana nangahachim aro ia mande sakbongaoni sakbride Assam-oni aro saksade Tripura a·dokoni ong·achim.
Koela a·damo kam ka·enggipa manderang, May-ni 30 tarik walo East Jaintia Hills a·jani koela a·damo gimaaha ine Silchar-ni Superintendent of Police (SP)-oniko kobor man·soani ja·man East Jaintia Hills a·jani police-rang, Sombar pring 6:00 bajimango ia manderangni gimagipa koela a·kolko sandie man·ahachim.
Indake ong·engon, Mongolbar salo mikkarang jimbee waengani a·sel koela a·kolo gimagipa manderangko sandianio neng·nikanirangko man·na nangenga ine East Jaintia Hills a·jani Deputy Commissioner E Kharmalki, kobor ra·timgiparangna parakataha.
“Ia biapo State Disaster Response Force (SDRF) aro Fire Service-ni sak 25 manderang donge kamrangko ka·enga aro chinga ia biapo chini tu·aniko nina crane-ko ra·baenga,” ine DC parakataha.
Ia biapona bilakbegipa pump-koba bi·atenga indiba sipairang a·kol ning·chi napangna man·ani ja·manosa ia pump-ko jakkalna man·gen ineba ua aganaha.
