TURA: Garo Hills Autonomous District Council (GHADC)-o kam ka·enggiparang bilsi gittam ong·na sipile dormaharangko man·kujaengani a·sel neng·nikanirangko chagrongna nangtokengahani gimin kam ka·enggiparangni dabienga gita komibeoba bilsisani dormahako gital pay scale-o on·na cholrangko sandichina dingtang dingtang dolrang, chong·motan New Tura Development Forum (NTDF), GSU, AYWO, Tura Garo Senior Citizens Forum aro Pensioners Association Tura Unit, GHADC-ni chief executive membor (CEM) Benedic R Marak-ko didiataha.
GHADC-o kam ka·enggiparang bilsi gittam ong·na sipile an·tangtangni man·na nangkuenggipa dormaharangko man·tokkujaengani gimin kamrangko ka·gija jingjengattokengon, bilsisani dormahako gital pay scale-o on·chenggenchimode kamtangtangko ka·piltaina kusi ong·engachim indiba executive committee, kam ka·giparangna jabongani dormahakosan gitcham pay scale-o on·na manchiskaengachim.
Indake ong·engon, batanggimin somoirango GHADC-o kam ka·enggiparang aro executive committee-ni gisepo meligrikna man·jae ma·manti so·sojengjeng ong·anirangko nikna man·ahani gimin ia NGO-rang, an·tangtangni suk ong·gijaniko parakatskaenba, ian jatna aro a·songna kratchana nanganisa ong·enga ine parakattokaha.
GHADC-o pilak kamrangan dontongatako man·engani a·sel nangchongmotgipa lekkarang, jekai professional certificate, licence-rang aro uandakgipa lekkarangko tarina nangenggipa manderang neng·nikanirangko chagrongna nangtokengaha ineba NGO-rang, ia neng·nikanirangko ta·raken namate kamrangko a·bachengatpiltaichina GHADC-ni CEM-ko didiataha.
“NGEA-ni dabianirangko aro mongsongbate kam ka·giparangna ja 12-ni dormaharangko gital pay scale-o on·china dabianiko chu·sokatna nang·on chu·gimik bil gnang ine chinga ma·sia. Uni gimin kam ka·giparangna bilsi gittam ong·na sipile grorang dongkuengoba uamangni nangnikani gita bilsisani dormaharangko gital pay scale-o on·chenge ja·mano uamangni bangki man·na nanganirangkoba on·na man·na gita cholrangko sandichina chinga nang·ko mol·molenga,” ine dingtang dingtang NGO-rangni pal, NTDF-ni general secretary, GHADC-ni chief executive membor-na sedoataha.