TURA: North Garo Hills a·jao bilsi gittam ong·gipa me·a bi·sa saksaba COVID-19-na porikka ra·anio positive ong·ahani gimin sorkari, chonchongipa bi·sarangna simsakbatchina gita ma·a paarangko didiataha.
Koborko on·ani gitade, Bristibar salo sakchet manderang North Garo Hills a·jao COVID-19 man·dapaha aro ia sakchetoni saksade bilsi gittam ong·gipa me·a bi·sa ong·achim.
Ia apsan salon North Garo Hills a·jao saksku manderangde COVID-19-oni nampilskana man·aha aro uandaken North Garo Hills a·jao COVID-oni nampilgiparang gimik sak 311 gapengaha ine official-rang u·iataha.
Da·o dipet North Garo Hills a·jao COVID-19 man·e dongenggiparang gimik sak 187 gapskaengaha aro COVID man·e sianggiparangara sak 5 gapskaengaha ineba u·iataha.
