SHILLONG: Re·anggipa Robibar attam dipet East Jaintia Hills a·jani Umpleng koela a·kolo gimaenggipa manderangko dingtang dingtang dolrang Sukrobar saloni sandina a·bachengengaha indiba mikkarang dontonggija waangahani a·sel ia feet 500-mang ong·e tu·gipa koela a·kolo chirang feet 7-mangni gita tu·batangaha ine official-rang u·iataha.
Da·o dipet ia chi gapgipa koela a·kolo mande sakbonga gimaenga ine official-rang aro ia biapo kam ka·enggipa sipairang aganengoba, ia koela a·kolo Robibar salpaksaonin koela cho·giparang dingtang dingtang dol dake koelarangko bikotengani gimin koela a·kolo gimagiparang batkunaba gnang ine chanchichipenga.
Ia koela a·kolo gimaenggiparangko sandina gita ia biapo NDRF-ni sak 35, SDRF-oni sak 15, Fire & Emergency Service-ni sak 7, ia biapo koela bikotgipa gitcham manderang aro contractor-rangba kamko ka·enga ine official-rang parakataha.
Indake ong·engon, ia koela a·kolo chirang gapengkuani gimin chirangko bon·e salopgalna man·ani ja·manosa ia koela a·kolo gimaenggipa manderangkode name sandina man·naba gnang ine ua biapo kam ka·enggipa official-rang parakataha.
Ia biapona NDRF dolni gita nangchongmotgipa ostrorang baksa chining ripgipa sipai sakgittamko watatahachim indiba ia somoio chirang namen tu·engkuani gimin chining ripgiparangnaba neng·beani kam ong·kugen ine u·iataha.