TURA: Tikrikilla PHC-ni ning·o donggipa Boldampitbari songo sak 13 manderangko COVID-19-na porikka ra·e positive ong·ahani gimin sabisini batrikrikaniko champengna gita Boldampitbari songko containment zone dakataha ine West Garo Hills a·jani Deputy Commissioner u·iataha.
Ia songko containment zone dakengmiting somoio COVID man·gipa manderangko quarantine dakan baksana gipinrangkoba porikka ra·e nianggen aro ia somoirango darangba ia songona re·bana ba songni manderangba gipin biapchi ong·katna man·jawa ine Deputy Commissioner u·iataha.
Ia songko containment zone dakengmiting somoio ia jolrango jinma tom·anirangko ba maiba program-rangko ong·atna man·jawa aro ia jolo donggipa pilak dokkanrangkon chipe dontokna nanggen ineba DC u·iataha.
Manderangni nangchongmotgipa bosturangko district administration-ni songe on·gimin dolrang manderangni nokrangona sokate on·skagen.
DC-ni u·iatani gitade, ia songko containment zone dakengmiting somoio ia jolo donggipa skul, college aro pilak office-rangkoba chipe donna nanggen.
