TURA: Sonibar salo VASU, South West Garo Hills District-ni Ghasura, Purasingha, Kumligaon, Samatigoan, Murikhati, Morkana aro Mahendraganj-o donggipa nokdang ge 300-na ration-ko aro gipin bosturang jekai- sanitary napkin, sabon, Zinc tablet ba uandakgiparangko suale on·aha.
Uandake VASU-ni official, indine aganaha, “songadamo donggipa manderang dingtang dingtang dakgipa neng·nikarangko chagrongako nike chinga uamangna dakchakpana chanchiaha. Iana skangba South West Garo Hills-o chinga bobil dolrangni bilake kam ka·miting somoioba kam ka·aha. Uandake ia somoio covid-ni a·sel gimikan neng·nikako man·tokenga uni gimin South West Garo Hills, Meghalaya-o covid-ni a·sel duko ga·akgiparangna dingtang dingtang cholrangchi dakchakenga.
Voluntary Association for Social Upliftment (VASU), NGO Regd No RS/KAM/240/Q/83, 2003-2004-o register ka·aha. Mahendraganj-o VASU-ni apparel tarigipa Training & Production centre donga aro Samatigaon-o Handloom Weaving Centre donga. Jekon kangal cholgri manderangni janggi tanganiko ra·dona miksonganiko bikotaha. Uandake VASU, Mahendraganj aro Samatigaon-o donggipa uamangni centre-o kam ka·gipa me·chikrangna National programme-koba bikotaha. Centre-o me·chikrangna multivitamin aro folic acid baksa midday meal-koba on·a.
Songadam jolrango donggipa manderangna skill development-ni gita, janggi tangna cholrangko bikote on·na miksonganio bilsi 2003-o register ka·e a·bachenggipa VASU, dingtang dingtang a·bao kam ka·e tang·dobaaha.
