SHILLONG: COVID-19 sabisini a·sel East Khasi Hills-o champengataniko ra·gatani da·o sal 45 ong·angpilengon, skotong songjinma Shillongo songdonggiparang aro bading chiwale cha·giparang, lockdown-ni niamrangko adita olgrokataniko da·o sorkarioniko nichaktokenga.
Sabisirang on·tisa komiangkalahani gimin lockdown-ko ra·gatjawahakon ine manderangni ka·donge nichaksomitingo, Meghalaya Sorkari mija antio lockdown-ko gipin antisana ra·dodapattaiaha. Maina ianchangode songdonggiparangna Sorkari maming dakchakanikoba on·a dongkujachim. Unigisepo Sorkari uamangna maming dakchakanikoba on·jaode lockdown-ni niamrangko olgrokatskachina gitaba sorkariko mol·molaha.
Shillongo bading chiwale cha·gipa saksao sing·on, lockdown ka·ani a·sel bading chiwale cha·giparangna aro kangal cholgrirangna namen gimaani ong·aha ine Shillong-ni mingsinggipa Delhi Mistan Bhandar dokkan nokgipa, Kailash Varma aganaha.
“Lockdown-ko ra·dorikrikaiode kangal cholgri manderangde maikae tanggen, manderang covid-nasan siaijawa indiba okgimu chakeba siskagen” ine saksan dokkandar Pariat aganaha.
Indake ong·engon, a·doko bading chiwale cha·giparang aro ramram manderang bang·an, lockdown ka·ani a·sel namen neng·nikanirangko man·tokenga ine nikatna man·a.
