SHILLONG: Meghalaya a·dokni koela a·damrango niam gri koelarangko bikotanichi a·sel ong·ani somoirango mikrakatani kattarangko agane dongaigija iandake niam gri koela bikotani aro koela salruraaniko champengna man·na gita rakbata niamrangko ra·gatchina Robibar salo, Meghalaya Democratic Alliance (MDA)-o bakrimpaenggipa United Democratic Party (UDP) dabiangaha.
“Iandakgipa a·sel ong·ani somoimangmango mikrakatani kattarangko agane dongaianikode manderang nangnikja indiba niam gri koela bikotani aro koela salruraaniko chu·gimik champengna kam ka·anikosa nangnikenga,” ine UDP-ni general secretary Jemino Mawthoh parakataha.
Adita salrangna skang, East Jaintia Hills a·jani Umpleng koela a·damo mande sakbonga gimaani ja·man, niam gri koela bikotenggipa manderangni kosako rakgipa ja·kurangko de·gen ine Chief Minister Conrad K Sangma-ni aganahani gimin UDP-ni dilgipa, ia kattarangko aganskaaha.
“Niam gri koela bikotaniko aro salruraaniko champengna rakgipa ja·kurangko de·anikosa nangenga,” ine UDP-ni general secretary parakataha.
Meghalaya a·doko koela bikotaniara chengonin manderangni janggi tangani chol mingsa ong·e bang·a nokdangrangnan janggi tangani cholrangko on·engachim ine janapatengon, a·doko koelarangko bikotanichi aro koelarangko salruraanichi sorkariba bang·en tangka paisarangko man·dapaha ine UDP-ni general secretary parakataha.
Batanggimin somoirango bang·en iandakgipa a·selrang ong·aha, manderangan bang·en siaha aro nokdangrang neng·nikanirangko chagrongna nangaha ineba Mawthoh parakataha.
A·doko niam gri koelarangko bikotanichi samtangtango ong·telaigiparangna nangchakeaniko ra·baani bidingo changni chang sorkarina u·iatahachim ine janapatengon, namroro silroroaniko ra·baani aro samtangtangko naljoke rakkianio kamrangko apsan niroke ka·na nanga ine UDP-ni dilgipa parakataha.
Niam gri koela bikotaniko champengna rakbata niamrangko ra·gatchina UDP dabia
Date:
Share post:
