TURA: North Garo Hills a·jani Rari PHC samba jolo donggipa Ronggopgre songo MGNREGS-ni ning·o rikgipa RCC dolongko Sombar salo, North Garo Hills a·jani Deputy Commissioner RP Marak-ni jakchi oprake on·angaha.
Ia RCC dolongko rikna gita 2019-20 bilsio gong lak 46 tangkarangko chame on·ahachim aro ia dolongni bakroaniara metre 45 ong·achim.
Ia RCC dolongko oprake on·angani somoio North Garo Hills a·jani Deputy Commissioner RP Marak, jinmana aganprakangengon, a·dokni namroro silroroanina sorkarini kam ka·anirangko jinmana talate on·angenba, ia sal somoirango COVID-19 giproroengani gimin sorkarini dongimin niamrangko ja·rikna nangengani giminba aganangaha.
Ia tom·aniko Bajengdoba block-ni BDO Ripamchi N Sangma dilangaha aro tom·anio North Garo Hills DRDA-ni Project Director ZJ Sangma, Rari PHC-ni Medical & Health Officer Dr R Ch Marak aro gipin officer-rangba dongpae jinmana aganprakangaha.
