SHILLONG: Da·o gnigipa changna COVID-19-ni giproroanio sabisi man·giparang ka·sinsin komiange gittamgipa changna COVID-19 giprorona manderang kensotokengon, ia gittamgipa changna COVID-19-ni giproroaniona Shillong songjinmani North Eastern Indira Gandhi Regional Institute of Health & Medical Sciences (NEIGRIHMS)-ba tarisamsoskaengaha.
NEIGRIHMS-ni Director Dr P Bhattacharya-ni parakatani gitade, uamang Health Ministry baksa agangrikjringenga aro gittamgipa changna COVID-19 giproroaniko warachaksona pilak nangchongmotgipa bosturangko aro sanna banani cholrangko NEIGRIHMS-na on·atchina gita uamang bi·atenga.
“Gittamgipa changona chinga an·tangtangko name tarisona man·na gita Health Ministry baksa tom·anirangko ong·ate agangrikjringenga,” ine Dr Bhattacharya parakataha.
Gittamgipa changna COVID-19 giproronaba gnang ine chanchichipsotokengani gimin Health Ministry-ni gitaba NEIGRIHMS aro gipin institute-rangna tangka paisarangko chame on·ani bidingo chanchisoengaha ine kobor on·aha.
Da·o jadok ba jachetmangni gisepon gittamgipa changna India a·songo COVID giprorotainaba gnang ine adita salrangna skangsan sorkarini songe dongipa National COVID-19 Supermodel Committee-ba parakatahachim.
Indake ong·engon, Meghalaya a·doko COVID-19-ko man·giparang da·o komiangengaha aro NEIGRIHMS-ona sokbaenggipa COVID patient-rangba komiangengaha ine NEIGRIHMS-ni Director parakataha.
East Khasi Hills a·jao jagimikna lockdown-ko ong·atahani a·sel COVID man·aniko komiataha ineba Dr Bhattacharya parakataha