SHILLONG: Meghalaya a·dokona chu·onga gita tikarang sokbaahaon, songadam nokadamrangoba tika su·chakani centre-rangko donatgnok ine a·dokni Health Minister AL Hek parakataha.
Iani bidingo kobor ra·timgiparangna u·iatengon, da·o dipet a·doko tikarang chu·onga gita dongkujani gimin songadam nokadamrango tika su·chakani centre-rangko donatna man·kujaenga indiba a·dokona chu·onga gita tikarang sokbaahaon songadam nokadamrangoba tika su·chakani centre-rangko kulidapna man·gnok ine Hek parakataha.
Bilsi 18-oni bilsi 44 ong·gipa manderangko tika su·na gita internet gitasa bimingrangko segatna nangengani giminba songadam nokadamrango internet-rangko name man·tokjani gimin bang·bata manderangan suk ong·gijaniko paraktokengachim ine nikna man·a.
Bilsi 18-oni bilsi 44 ong·gipa manderangko tika su·na gita da·o biapona re·kame bimingrangko segatchina ma·mong sorkari, a·dokni health department-na ge·etaniko on·manahaoba jillarangode online gita registration ba biming segataniko dakangkugen ine health official-rang parakataha.
Internet man·gijagipa biaprango, mongsongbate songadam nokadamrangode centre-rango biming segataniara namgni ong·genchimoba manderangni jinma tom·dakanirangko nirok sandianio neng·nikanirangko man·skagen ineba health official-rang aganaha.
Centre-rango biming segatna gita manderangni jinma tom·dakanirangko nirok sandianio joltangni dilgiparangan, health department-na dakchakanirangko on·angskagen.
Da·o dipet Meghalaya a·doko spot registration ba centre-rango biming segatna gita a·dokni health department, chanchisamsoanirang dongkujaenga ineba u·iataha.
