TURA: Gnigipa changna COVID-19-ni giproroanio sabisiko warachakna gita dingtang dingtang dakbewalrangko ja·rikani, porikkarangko ra·e niani aro sanna bananirangko on·ani bidingo chanchirimna gita Mongolbar salo, West Garo Hills a·jani Deputy Commissioner Ram Singh, dingtang dingtang department-ni officer-rang, mondolini dilgiparang aro dingtang dingtang dolni dilgiparang baksa Tura-ni DRDA conference hall-o tom·aniko ong·atangaha.
Ia tom·anio West Garo Hills a·jani Deputy Commissioner, a·jao COVID man·aniko jinmana talate on·angengon, Tura-o COVID man·e siani da·o 7 percent-ona komiangaha ine parakataha.
West Garo Hills a·jao COVID man·giparang ka·sinsin komiangengaha ine janapatengon, COVID-ko warachakna gita gital dakbewalrangko ja·rikna aro manderangna agan-ku·pattianirangko on·na nangengani gimin Deputy Commissioner aganangaha.
Block-tangtangni manderangko tika su·e ra·china, COVID-ko warachakna dongimin dakbewalrangko ja·rikchina aro COVID-ko warachakanio pilakkon bakrimchina didina gita Deputy Commissioner, dingtang dingtang block-ni BDO-rangko ge·etangaha.
Mothers Union-ko dilenggiparangni sing·anirangna aganchakaniko on·angengon, mask gangijagipa manderangnade dokkanrango dongtimgiparang bosturangko palna man·jawa aro dongimin niamrangko pe·genchimode licence-rangko den·galgen ine Deputy Commissioner parakatenba, iani bidingo bazar committee-rang baksa tom·anirangko ong·achina West Garo Hills a·jani SP VS Rathore-ko didiangaha.
Tika su·kugijagipa labour-rangkode Tura bazar aro super market-o kam ka·na on·jawa ineba ia tom·anio Ram Singh parakataha.
