TURA: National People’s Party (NPP)-ni membor saksa Enamul Hoque-ko Meghalaya sorkarini ning·o donggipa Forest department-ni vice chairman songa intalan West Garo Hills a·jani a·kawe jolrango aro mongsongbate Selsella Assembly constituency-ni ning·o NPP-ni membor-rang meligrikna man·tokjaenga ine Selsella constituency-ni NPP worker-rang matnangatenba, ia mandeko vice chairman-ni kamoniko ra·galpilchina gita a·dokni Chief Minister aro NPP-ni national president Conrad K Sangma-na sedoataha.
Selsella constituency-ni ning·o NPP dolna kamko ka·enggipa manderangni parakatani gitade, Forest department-ni vice chairman songgipa Enamul Hoque-ko ia constituency-o NPP-na kamko ka·enggipa bang·bata manderangan namniktokjachim aro uandaken ia bilsini gisepo ong·atanggipa GHADC election-o uko Balachanda GHADC constituency-ni party candidate dake seokahaoba ua 1700 vote-rangchi amako man·ahachim.
“Enamul Hoque-ko Forest department-ni vice chairman songa intalan a·kawe jolrango on·tisa kamrangna meligrikna man·tokjaha aro NPP-na kamko ka·enggipa bang·bata manderangan ia mandeo ka·dongna man·tokjaha. Iani a·selsa GHADC election-oba NPP dol 1700 vote-rangchi amchepako man·aha,” ine Selsella constituency-ni NPP worker-rang parakataha.
NPP worker-rangni parakatani gitade, Enamul Hoque aro Selsella MLA-ni gisepoba apsan nangrime kam ka·anirang dongjaenga aro bang·bata manderangan ia mandeni kamo suk ong·tokjaenba da·o Selsella constituency-ode NPP worker-rangni gisepo bak daka gita ong·pilengahachim.
“Chingni koborko man·soani gitade, da·o COVID-19 giproroengmiting somoioba ia vice chairman, sorkari officer-rangoniko kam ra·jitatjana gita tangka paisarangko dabie ra·enga aro VEC secretary-onikoba dingtang dingtang kamrangni tangkarangko on·na gita tangka paisarangko dabienga,” ine Selsella constituency-ni NPP worker-rang parakatenba, Enamul Hoque-ko vice chairman-ni kamoniko ra·galenba, uni biapo gipin membor-ko songskachina Chief Minister-ko didiataha.
