OVID man·e serikna man·gijagipa candidate-rangna porikkako ong·attaigen

SHILLONG: Meghalaya Board of School Education (MBOSE)-ni SSLC aro HSSLC porikkarangni bidingo Education department, re·baenggipa June 14 tariko chanchianggen ine Budbar salo, a·dokni Education Minister Lahkmen Rymbui parakataha.
Porikka sepiltaina nangenggipa chatro chatrirangko, MBOSE-o sing·sandiechina gita u·iatmanaha ine parakatengon, HSSLC-ni bangki dongkuenggipa porikkarangko ong·atani bidingo sorkari bakan tik ka·anggen ine Education Minister talatangaha.
SSLC-ni result-rangko parakatani bidingo janapatskaengon, kamrangko matchotmanahaon je somoioba SSLC porikkani result-ko parakatgen ine Rymbui u·iataha.
Indake ong·engon, COVID-19 giproroani a·sel ia bilsini SSLC aro HSSLC porikkarangko serikna man·gijagipa chatro chatrirangna dingtangmancha porikkako ra·na sienga ine MBOSE-ni official-rang parakatskaaha.
Iani bidingo talataniko on·angengon, porikkako ong·atani somoio je candidate-rangan COVID-19 man·e quarantine-o dongna nangahachim, ba je candidate-rangan COVID man·gipa mandeni primary contact ong·achim ba je candidate-rangan containment zone dakatako man·gipa biaprangoni ong·e sorkarini see on·gipa lekka dongachim, uandakgipa candidate-rangsa ia porikkako sena man·gen ine MBOSE-ni official-rang parakataha.
Ia porikkao candidate-rangna, uamangni serikna man·gijagipa subject-rangkosan sena on·aigen ineba MBOSE parakataha.
“Dorgasto seamangmangchide ia porikkako sena man·gen ong·ja aro porikkao subject-rangkoba dingtangatna on·jawa,” ine MBOSE-ni u·iatanio parakataha.
Ia porikkako sena nangenggipa candidate-rang, MBOSE-ni www.mbose.in website-oniko dorgasto form-ko download ka·enba, an·tangtangni nangchongmotgipa lekkarang baksa SSLC porikkana [email protected] aro HSSLC porikkana [email protected] address gita June 21 tarikna skang e-mail ka·atna nanggen ineba MBOSE-oni u·iataha.