TURA: College-rango kam ka·enggipa manderangni salsani dormahako on·gilanichi game ge·e cha·giparangko dakchakna ong·atenggipa ‘Agriculturally Vibrant & Self Reliant (AVSR) ine NEH Region’ program-ko re·anggipa Budbar salo, Central Agricultural University-ni gita Tura-ni Community Science College-oba ong·atangaha.
Tura-o ia program-ko ong·atanio Tura-ni MP Agatha K Sangma, internet gita bakko ra·angengon, da·o gita sabisirang giproroengmiting somoio iandake game ge·e cha·giparangko dakchakna kamko ka·engani gimin Community Science College-ko mittelpilangenba, a·dokni namgnina mikkangchi dingtang dingtang kamrangko chu·sokate on·angkuchina didiangaha.
Ia program-ko ong·atanio bang·bata game ge·e cha·giparangan internet gita bakko ra·angtokaha aro ia program-ko apsan salon, dingtang dingtang salgro salaram a·dokrango donggipa dam 13 CAU campus-rangkoba ong·atangaha.
Tura-o ia program-ko ong·atanio ‘Bhai Bon’ self help group, USHA sewing machine-ko aro ‘Maa Shakti’ SHG gong 10,000-ni napkin tariani bosturangko man·aha.
Lower Sangsanggre-ni game ge·e cha·giparang aro Aminda Rangsagre songni ‘Farm Women Knowledge Group-rang’, te·rik, letchu, te·gatchu aro uandakgipa bolni chararangko man·skaaha.
