SHILLONG: East Jaintia Hills a·jani Umpleng jolo donggipa Krem Ule koela a·kolo gimagipa manderangko sandianio chu·sokna man·kujaengani gimin a·dok sorkari, Indian Navy-ni dakchakaniko bi·ataha.
East Jaintia Hills a·jani koela a·kolo gimaenggipa sakbonga manderangko man·pilkujaengani gimin sorkari, ia manderangko sandina gita Indian Navy-ko okamataha.
“Koela a·kolo gimaenggipa manderangko sandina gita Navy-ni chining ripgipa manderangko watatchina chinga defence ministry-na seataha,” ine Bristibar salo a·dokni Chief Minister Conrad K Sangma, kobor ra·timgiparangna parakataha.
Koela a·kolo gimagipa manderangko sandina sorkari pilak cholrangkon sandienga ineba Chief Minister aganaha.
Indita salrangni ja·manoba koela a·kolo gimaenggipa manderangko man·pilkujaengani gimin sandianiko dontongani cholrang dongama ine sing·on, “Koela a·kolo gimaenggipa manderangni janggirangko jokatna pilak man·a kamrangko ka·e nianian sorkarini daito ong·a,” ine Sangma parakataha.
Chief Minister-ni u·iatani gitade, ia koela a·kolo gimaenggiparangko NDRF baksana dingtang dingtang dolni sipairang ia biapo donge sandiengoba man·pilkujaengachim.
NDRF, SDRF aro Fire Service-ni komibeoba sak 100-mangni gita sipairang, ia biapon dongkame kamko ka·engachim aro da·o komibeoba metre 10-mangona chi tipangako senge dongkuengachim.
Re·anggipa May jani 30 tariko Sutnga Elaka-ni koela a·kolo dynamite boma gopretani ja·man rang·san ia koela a·kolo chi napenba ia koela a·kolo koela bikotenggipa sakbonga manderang gimaengachim.
Ia a·sel ong·ani ja·mano police-rang, ia koela a·kolo niam gri koelarangko bikotengani gimin koela a·damni nokgipa Shining Langstang-ko rim·ahachim.