SHILLONG: Sonibar saloni Robibar salona konta 24-ni gisepon Meghalaya a·dok gimiko sak 547 manderang COVID-19-oni nampilna man·aha indiba ia apsan salon sak 305 manderang COVID-19 man·dapskaaha.
Robibar salo COVID-19 man·dapgipa sak 305 manderangko channe da·o Meghalaya a·dok gimiko COVID-19 man·e dongenggiparang gimik sak 4623 gapaha aro apsan salon sak 6 manderang COVID-19 man·e siangdapahani gimin a·dok gimiko COVID man·e sianggiparangara gimik sak 733 gapskaengaha.
Konta 24-ni gisepo COVID man·e sianggipa sak 6 manderangoni sak 4-de East Khasi Hills-o, sak 1-de East Jaintia Hills-o aro sak 1-de West Garo Hills a·jao ong·skaa.
Ia apsan salon gimik sak 547 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 36550 gapskaengaha.
Health official-rangni u·iatani gitade, Sonibar salona kingking Meghalaya a·dok gimiko sak lak 5.01 manderang COVID-ni tikarangko su·e ra·manskaaha.