TURA: Garo Hills Autonomous District Council (GHADC)-o Zikzak GHADC constituency-ni Non-Tribal MDC Aktar Ali-ko Forest Advisory Committee-ni chairman songani gimin Association for Democracy & Empowerment (ADE) dolba raken jegalataha aro uni biapo A·chik MDC-ko songskachina GHADC-ni Executive Committee-ko didiataha.
“GHADC-o Tribal ong·gijagipa MDC-ko Forest Advisory Committee-ni chairman songaniko chinga raken jegalenga maina chinga a·bachengonin GHADC-ni kamrango gipin jatrangni bak ra·paaniko jegalenga. GHADC-o uni membor ong·paanikon chingade ong·nikja aro ia Non-Tribal MDC-ko ia board-ni chairman songanikode chinga maming dakeba ra·chakna man·jawa,” ine kamtangko jako ra·epilgipa ADE-ni president Dalseng Bira Ch Momin parakataha.
Aktar Ali-ni biapo A·chik MDC saksako Forest Advisory Committee-ni chairman songskachina dabiangengon, a·kawe jolrango Garo Hills-ni bol wa·arangko pale cha·enggipa manderangara bang·batan Tribal ong·gijagipa manderangsa ong·a aro Ali-ko Forest Advisory Committee-ni chairman songahaode niam gri bol badinge cha·enggiparangna bilko on·dapani gitasa ong·gnok ine ADE-ni president parakataha.
Ia bilsini GHADC election-o susana gita ADE-ni president Dalseng Bira Ch Momin, ADE president-ni kamko watangahachim indiba ADE-ni gipin dilgiparang aro dingtang dingtang unit-rang uko kamtangko ra·pilchina okamahani gimin ua ADE president-ni kamko jako ra·epilahachim ine nikna man·a.
Indake ong·engon, Garo Hills-o COVID-19-ni a·sel dingtang dingtang neng·nikanirangko chagrongna nangengani gimin iandakgipa kamrangko niroke ka·dilangna gita ADE-ni dingtang unit-ko bikotaha ineba ADE-ni president parakataha.
Momin-ni parakatani gitade, ia unit-ko dilna gita seokako man·gipa manderangara, president-na Sudeep Ch Marak, general secretary-na Supam Marak, vice president-na Kalgros R Marak, asst general secretary-na Lian Ch Marak, additional general secretary-na Rakranbert R Sangma, chief organising secretary-na Wisefield D Sangma, organising secretary-na Sengban G Momin, Ganseng D Sangma, Nikkebar D Sangma, Christobirth D Sangma aro Sengchang N Sangma, environment secretary-na Verney S Momin, literary & magazine secretary-na Quintalrose A Sangma, games & sports secretary-na Jongnal M Sangma, RTI secretary-na Frederick A Sangma, publicity secretary-na Bilshan Ch Sangma aro sak 40 executive membor-rang ong·a.
