SHILLONG: Meghalaya a·dokni dingtang dingtang police station aro police outpost-rango nambate kamrangko ka·na man·na gita ia police station/outpost-rangko bilakbatatna aro sipairangko rimdapna gita Mongolbar salo, a·dokni Chief Minister Conrad K Sangma, a·dokni dingtang dingtang police officer-rang baksa tom·e chanchirimangaha.
Chief Minister-ni kobor ra·timgiparangna parakatani gitade, a·doko police station ba police outpost-rangko, kam ka·ani bewalrangko aro kam ka·giparangko rimdapanichi police dolrangko bilakdapatna nangengani gimin ua a·dokni Home Minister aro dingtang dingtang police officer-rang baksa tom·e chanchirimangaha.
“Kenchakna nangbatgipa biaprango police outpost-rangko songani aro bang·bata biaprangon police station ba outpost-rangko nambatatna gita sipairangko rimdapani giminba chinga ia tom·anio chanchirimangaha,” ine Chief Minister parakataha.
Meghalaya a·doko sipai dolrangko bilakdapatna gita ja·kurangko de·engon, tangka paisarangkoba nie kamrangko ka·na nanggen ineba Chief Minister aganaha.
Meghalaya Police-ni 7th aro 8th battalion-rangni bidingo janapatengon, ia battalion-rangko chalaina gita ma·mong sorkaride chu·gimik tangka paisarangko on·e dakchakjawa aro bilsisani gisepon a·dok sorkarisa chu·gimik tangka paisarangko koros ka·na nanggnok ine Sangma talatangaha.
“Re·baenggipa bilsirango tangka paisani gita neng·nikanirangko chagrongna nangjana gita chinga maiko dakchengo nambatgen, uko nie ja·ku de·anggen,” ine Chief Minister parakataha.