SHILLONG: Shillong songjinmani Bara Bazar ba Iewduh-o donggipa dokkanrangko Sukrobar sal dipet kulipiltaina gita East Khasi Hills a·jani Deputy Commissioner u·iatmanahani gimin Bara Bazar-o dokkan dakenggipa pilakkon COVID-ni tikarangko su·e ra·chengchina gita a·dokni Health Minister AL Hek ge·etangaha.
Dokkan dakenggipa manderang, jemangan COVID-ni tikako su·jachim, uamangkode dokkanrangko kulina on·jawa ineba Health Minister u·iataha.
Iana skang, Bara Bazar-o dokkan dakenggipa manderangko East Khasi Hills a·jani Deputy Commissioner, COVID-ni tikako su·e ra·china ge·etahani gimin ian manderangni skani gitasa ong·na nanga ine manderang, jegaltokskaahachim ine nikna man·a.
Deputy Commissioner-ni u·iatgipana a·dokni Health Minister-ba taldapataniko on·angengon, ian DC-ni didianisan ong·aia indiba dokkan dakenggipa manderang, bang·a manderangko chagrongna siengani gimin tikarangko su·e ra·chongmotna nanga ine parakataha.
“Ian dokkan dakenggipa aro bosturangko breenggipa manderangni namgninan ong·enga,” ine Hek aganaha.
West Khasi Hills a·jaoba, COVID-ni tika ponggniko su·gipa manderangnade District Administration-ni gita gong 10,000-ko boksis dake on·gen ine Nongstoin-ni BDO parakatahani gimin da·o social media-rango manderangni seachi golpogrikanirangko nikna man·skaengahachim.
Iani bidingo talataniko on·angengon, manderangko tika su·china didina gita dingtang dingtang district administration-rang, an·tangtangni man·a gita ja·kurangko de·enga ine Health Minister parakataha.
“Manderangko tika su·na didina gita an·tangtangni changa sapanirangko jakkalchina chinga dingtang dingtang a·jani DC-rangna pakwate on·manaha,” ine Hek parakataha.
Manderangna tikarangko su·ani bidingo pilakni gitan u·iatna sorkari jotton ka·aha ineba Health Minister parakataha.
Indake ong·engon, Iewduh-o dokkan dakenggipa manderangna Budbar salo dingtangmancha tikarangko su·e on·angaha aro ia biapo dokkan dakenggiparangoni sak 300-na baten manderang tikarangko su·e ra·na re·batokaha.
Meghalaya a·dokni Chief Minister Conrad K Sangma-ba dokkanrango an·tangtangni tika su·e ra·aniko see donahani gimin kusi ong·aniko parakataha aro an·tangtangni namgnina bosturangko brena re·baenggipa manderangkoba tikarangko su·e ra·na didichina gita dokkan dakenggiparangko didiataha.
