TURA: West Garo Hills a·jao aro mongsongbate Tura jillao bilsi 45 batgimin manderangoni bang·bata bading chiwalgiparang, garirangko salgiparang aro hajira kam ka·e cha·enggipa manderangan COVID-ni tikarangko su·tokkujaenga ine nikahani gimin tikarangko su·china gita West Garo Hills a·jani District Magistrate ge·etaniko on·ataha.
District Magistrate-ni u·iatani gitade, West Garo Hills a·jao aro mongsongbate Tura jillao bilsi 45 batgimin manderangoni bang·bata bading chiwalgiparang aro dokkan dake cha·enggiparangan tikarangko su·gija dokkanrangko kuliengani a·sel gipinrangna aro an·tangtangnaba kenchakna nangani ong·engani gimin dokkanrango dongtimgiparangko, auto aro uandakgipa garirangko salenggiparangko aro hajira kam ka·e cha·enggipa manderangko ta·raken sepangbatgipa tika su·chakram biaprangona re·ange tikarangko su·e ra·china ge·etaniko on·angaha.
Da·o dipet bilsi 45 batgimin manderangoni tikarangko su·e ra·gipa manderang, West Garo Hills a·ja gimiko 80 percent aro Tura-o 96 percent-san ong·kuengani gimin tika su·aniko 100 percent gapatna man·na gita rakbate kamko ka·china Tura Municipal Board-ni Chief Executive Officer, District Transport Officer, District Immunisation Officer aro dingtang dingtang bazar committee-rangnaba District Magistrate ge·etaniko on·ataha.
