SHILLONG: Chief Minister Conrad Sangma-ni legislator-rangko Covid-19 ward-o PPE kit-ko gane kam ka·enggipa healthcare workerrangni chagronggipa neng·nikako nirokatna ge·etanio, Opposition -ni dilgipa Mukul Sangma, raken aganchakataha.
CM-ni kattana aganchakatengon, Mukul Sangma, indine aganaha, “Chinga chu·gimik kamrangko nirokna ong·katjringa aro chong·mot obostako mikrontangchin nike u·ia.”
‘Covid ward-o PPE kit-ko gane kam ka·gipa doctor, nurse aro health worker-rang maidakgipa neng·nikako man·a, iako an·tang ward-o nape niosa u·ina man·gen, ine adita salrang skang Conrad, ia kattarangko aganataha.
“ICU-rang kam ka·gijako nikna man·gen, aro civil hospital-o man·sogipa ventilator-rang kam ka·ja aro skia man·gipa manderangba dongja. Da·ode ventilator-ko maidake jakkalna nanga iani gimin training-ko on·engjok, ian gure katmanosa do·gako chipna jotton ka·aming apsanaia, ine Mukul aganaha.”
Ia somoide, covid sabisini gittamgipa wave-ko maidake warachakna man·gen iani gimin tarisoani kamsa ong·a ineba Congress-ni dilgipa aganaha.
Uandake Mukul, CM-ko advance life saving support donggipa ambulance-ni bidingoba sing·ataha, “Maidakgipa ambulance-ko CM brea? Ambulance-ko brena skang maidakgipa ambulance-ko brena nanga iani gimin sandia dongjama?”
Indake ong·engon, Congress-ni a·gipi dilgipa aro gitcham Chief Minister Mukul Sangma, a·dok sorkariko Covid-19-ni obostao matnangaha. Sorkari covid-19-ni obostao on·gipa report-o kakket ong·ja ine aganaha.
‘Chong·mot obostako u·ina chinga gimik district-rangona wene niaha, unon sorkarini, agangipa kattarangara, chong·mot obosta baksa melija, ine Dr Sangma aganaha.
“Frontline worker-rangna nangchongmotgipa equipment-ko on·genchimoba, equipment-ko maidake jakkalna nanga iani gimin skie on·nanian dongja. Unbaksana a·dokni hospital-rango ICU -kode donaha indiba jakkalaan dongja. Jeko sorkari aganaha, uarang kakket ong·ja, ine Dr Sangma matnangaha.
