TURA: West Garo Hills-ni Deputy Commisioner Shri. Ram Singh-ni mejal Sonibar, chong·motan June 19 tariko parakani gitade, a·jao covid sabisini obostarang namkalkujaengani gimin knal Sombar, May 21 tarik pring 5 a.m bajioni a·bachenge re·baenggipa June 28 tarik pringni 5 a.m bajiona kingking batanggimin May 30 tariko on·anggimin apsan hukumko ja·rikate West Garo Hills a·jao lockdown-ko ra·doangkugen.
DC-ni hukumo janapani gitade, Tura Main Bazar aro uni wilwilao donggipa jolrango skango gitan nangchongmotgipa bosturangko palenggipa dokkanrangkode a·jao ra·gatgimin niamrangko ja·rikate Sombar-oni Sukrobar salona, salantian pring 8 am bajioni, attam 4 pm bajimangona kulichina on·angenga.
Uandake, nangchongmotgijagipa bosturangko palenggipa dokkan aro gari-gura ba mobile phone-rang nosto ong·ao tarigipa dokkanrangkode antio salgni chong·motan, Mongolbar aro Bristibar salrango, pringni 8 am bajioni attam 4 pm bajiona dipet kulichina on·skaenga ineba district magistrate-ni on·atgipa hukumo janapaha.
Apsandake,West Garo Hills a·jani ning·ode batanggimin chango ra·gatgimin apsan niamrangko ja·rikangkue, (odd-even)-ni niamo pangchake salprak bodolgrike salrurana on·engon, nangchongmotgipa kamrangna ong·katana agreba gipin garirangni re·ruraanikode watskataikujaenga.
Iani gisepon, district damsa damgipinonade gimik dakgipa gari-gurarangkoba watkujaenga. Indiba nangchongmotgipa kamrangna re·ruragipa gari gurarangkode curfew pass baksa watskagen ineba hukumo janapaha.
Indake ong·engon, biap damsaoni damgipinona re·rurana gita tol·e curfew pass-ko ra·enba magistrate-ni ra·gatgimin niamko pe·e gari-gurarangko salruraengako rim·a man·ode niam gita uamangko bichal ka·anggen ineba mikrakatjolaha.
West Garo Hills a·jao re·anggipa chango niam ra·gatgimin gita antio bajar cha·anirangko, chong·motan Sonibar aro Robibar salrango bajar cha·rongaoniko chipatangkuan baksa, a·jao corona curfew-ko attam 5 p.m bajioni pring 5 a.m bajiona salantion ra·gatangkuenga ineba DC parakataha.