SHILLONG: Tura Civil Hospital-o PSA Oxygen Generation Plant-ko mijal Mongolbar salo, Meghalaya a·dokni Chief Minister Conrad K Sangma baksana India a·songo donggipa Japan a·songni Embassy aro United Nations Develoment Programme (UNDP) kulie on·angaha.
Ia Oxygen generation plant ba oxygen bikotani kolko kulie on·angani somoio a·dokni Chief Minister jinmana aganprakangengon, da·o gita sabisirangni giproroenganichi neng·nikanirangko man·engmiting somoio dakchakanirangko on·ahani gimin Japan sorkari aro UNDP-ko mittelpilangenba, ian India aro Japan a·songni gisepo meli nangrimaniko bilakbatatani gita ong·gen ine parakangaha.
Sabisirangni giproroaniko warachakaniara namen rakbegipa kam ong·genchimoba an·seng baljokani a·bao kamko ka·enggipa manderang rakbee kamrangko ka·enganichi da·o sabisini giproroaniko adita komiatna man·aha ineba Chief Minister aganaha. Japan sorkari aro UNDP-ni dakchakanichisa Meghalaya a·doko ta·raken oxygen plant-rangko kulina man·aha ineba Chief Minister parakataha.
Ia PSA oxygen generation plant-ko kulie on·angani somoio India a·songna Japan a·songni Ambassador Extraordinary aro Plenipotentiary Suzuki Satoshi-ba internet gita aganprakatengon, India a·songni nangan somoio dakchakaniko on·na man·ahani gimin aro salgro salaram a·dokrango ia oxygen plant-rangko kulina man·ahani gimin an·tangni kusi ong·aniko parakataha.
An·tangni Shillong-ona re·baaniko gisik ra·atpilangengon, sabisini giproroanirang namangahaon Cherry Blossom Festival-ona re·bapile bakko ra·taina sikaniko Satoshi parakataha.
Japan sorkari aro United Nations Development Programme (UNDP)-ni dakchakanichi Meghalaya, Nagaland aro Tripura a·dokrangoba gimik damchet oxygen generation plant-rangko songe on·angahachim.
Ia apsan salon, Nongpoh Civil Hospital-ni PSA Oxygen Generation Plant-ko a·dokni Health Minister AL Hek aro Jowai MCH Hospital-ni PSA Plant-ko Jowai-ni MLA W Shylla a·bachengate on·angskaaha.
