TURA: Ia sal somoirango North Garo Hills a·jaoba COVID-19-ko man·giparang batroroengkuani gimin obostarang namkalkuja dipet Bajengdoba block-ni Chakodam song sambao donggipa Baralipara a·briona manderangni jinma re·ange roaniko district administration champengatchengaha.
Koborko on·ani gitade, dingtang dingtang biaprangoni manderang, chuttini salrango ia Baralipara a·briona rona re·angtokrongengachim indiba da·ororo obostarang namkalkujaengani gimin ia biapona manderangni jinma re·ange roaniko North Garo Hills a·jani district administration champengatchengaha.
North Garo Hills a·jao COVID-19-ni batrikrikaniko champengna gita antigimikan dingtang dingtang niamrangko done, Sonibar aro Robibar salrangode chu·gimik lockdown-ko ra·gatengkuachim ine nikna man·a.
Indake ong·engon, obostarang namkalkuja dipet Sonibar aro Robibar salrangko man·chape antini gipin salrangoba manderangni jinma ia Baralipara a·briona re·ange roaniko champengatchengaha ine North Garo Hills a·jani district administration, jinmana u·iataniko on·angaha.
