TURA: Meghalaya a·dokni skigiparangna sorkarini dongimin Meghalaya Teachers Eligibility Test (MTET)-ni bidingo Songsak Block-ni Block Mission Coordinator (BMC)-ni u·iataniko All Garo Hills SSA School Teachers Association (AGHSSASTA) jegalatenba, iani bidingo a·dokni Education Minister Lahkmen Rymbui-na sedoataha.
Education Minister-na sedoatgipa chittio SSA skigiparangni parakatani gitade, ia bilsini June 18 tariko Songsak-ni BMC, ‘2010 bilsini August/September jani ja·man kamna seokako man·gipa skigiparangde MTET-ko pass ka·na nanga aro MTET-ko pass ka·jagenchimode kamoniko ra·gala man·gen’ ine u·iatenba, form-rangko submit ka·na gita 2021 bilsini July jako bon·kamgipa tarik dake donatahachim. Iani bidingo joltangtangni skigiparangna u·iatchina gitaba Songsak-ni BMC, CRC-rangna ge·etaniko on·ahachim.
Indake ong·engon, iani bidingo u·iataniko a·dok sorkari June 8 tarikon dontongatchengahachim aro iani bidingo AGHSSASTA-ni dilgiparang, District Mission Coordinator-oniko sing·sandion da·o dipet sorkarioniko iani bidingo maming u·iataniko man·soa dongkuja ine ma·sina man·ahachim.
Ia u·iataniko Songsak-ni BMC, chubata gadangni official-rang baksa agangrikchenggijasa on·aha ine janapatengon, skigiparangni namgnina iani bidingo ja·kuko de·china gita skigiparang, a·dokni Education Minister-ko didiataha.