SHILLONG: National People’s Party (NPP)-chi dilenggipa Meghalaya Democratic Alliance (MDA) sorkarini kam cholijani a·sel Meghalaya Energy Corporation Limited (MeECL)-ni kamrang ja·donggaatako man·engaha ine Bristibar salo Congress dolni ku·wattimgipa Zenith Sangma matnangatenba, Meghalaya a·dokko bading chiwalram gita chalaijachina sorkariko didiangaha.
Zenith Sangma-ni parakatani gitade, MeECL-ko chalaisretani bidingo changni chang ku·rangko on·ahaoba da·onan Board of Directors-o Power aro Finance department-rangoni dongpagiparang dongkujaengachim.
“MeECL-ni nangchongmotgipa kamrangna ja·kuko de·anio sorkari namen mikrakna gita nangachim indiba sorkarini ning·on ong·gija miksonganirang dongani gimin ja·kurangko de·anio maming mikrake kam ka·anirang dongjaenga. Sorkarini ong·gija dakanirango maming champenganirang dongjana gitasa iani bidingo maming ja·kurangko de·jaenga aro pilak kamrangon CMD-sa jakgitele sason ka·na man·enga,” ine Congress dolni dilgipa matnangataha.
MeECL-ko chalaisretengani a·selan corporation-o donggipa 356 MW-oniko 60 MW-kosan bikotna man·enga aro japrakon gong kror 50-na bate noksan ong·ataniko man·enga ineba Sangma parakataha.
“MDA sorkarini miksonganirang namjani a·selan MeECL, Meghalaya sorkarini ning·o ong·janaba dongaha aro uamang MeECL-ko gipin private company-rangni jako on·nasa cholko on·engaha,” ineba Sangma parakataha.
Congress MLA-ni parakatani gitade, MeECL-ni japrako man·aniara gong kror 80-oni gong kror 85-mangonasan ong·engon grorangko man·chape japrako koros ka·aniara gong kror 110-mang ong·skaengachim.
“Uni gimin japrakon gong kror 25-oni gong kror 30-mangni gitade MeECL-ko chalainio noksan ong·enga,” ine Sangma talatangaha.
Iandake ong·gija kamrangoni an·pilchina gitaba ua a·dokni Chief Minister Conrad Sangma aro Power Minister James Sangma-ko didiataha.
“Ka·sapae a·dokko bading chiwalram gita chalaipajachina aro manderangni nangnikani gita namgipa sorkarikosa chalaichina,” ine Zenith parakataha.
