SHILLONG: Batanggimin konta 24-ni gisepo Meghalaya a·doko sak 505 manderang COVID-19 sabisiko man·daptaiaha aro ia apsan somoini bakon sak 499 manderang COVID sabisioni nampilskaha. Unomitingo COVID man·e sianggiparang basakoba bata basakoba komia dake dongenga, jeon mijalode komibate sak 3 manderang COVID man·e siangaha.
Batanggimin konta 24-ni gisepo sak 505 COVID man·dapgiparangoni EKH-o sak 148, WJH-o sak 92, Ri-Bhoio sak 83, WGH-o sak 63, NGH-o sak 44, EGH-o sak 23, WKH-o sak 16, SWGH-o sak 11, SGH-o sak 10, EJH-o sak 9 aro SWKH-oni sak 6.
Ia apsan somoion sak 499 COVID man·gipa manderang a·dokni dingtang dingtang biaprango sabisioni nampiltokaha, uamangoni EKH-o sak 173, WGH-o sak 78, Ri-Bhoio sak 75, EGH-o sak 36, SWKH-oni sak 31, WJH-o sak 25, WKH-o sak 23, NGH-o sak 21, SGH-o sak 18, SWGH-o sak 11 aro EJH-oni sak 8 manderang COVID-oni nampiltokaha.
Indake Sonibar salni bako A·dokni dam gittam district-rango sak 3 manderang COVID man·e siangtaiaha. Ri-Bhoi, West Garo Hills aro South West Garo Hills district-rango sakprak COVID man·e sidapaha.
Meghalaya a·doko COVID man·giparang mijalona gimikchi sak 47,985 gapangaha, uamangoni sak 42,500 manderang sabisioni nampiltokaha, aro sak 817 manderang sabisio siangaha, indake da·o sak 4,668 manderang a·doko COVID man·e dongengkua.
