SHILLONG: Shillong-Dawki road project-ni bakna Rilbong Junction-oni Upper Shillong-ona four-lane ramako rikna gitcham English pine tree ba shillongket bol bipangko den·galani gimin jegaltokanina Deputy Chief Minister in-charge PWD, Prestone Tynsong, talataniko on·ataha. “Sorkari, clearance ba ra·chakaniko man·a ja·mansa project-ko a·bachengaha. Forest Conservation Act, bol bipangko den·anina bol bipang ge·skana aganaha, jekon sorkari ra·chakaha.”
PWD, Forest Department-na gamaha, bol bipangko de·ani palo West Khasi Hills-o bol bipangko ge·skana a·ako ra·aha, ine Tynsong agandapaha.
Ramako rikna dongimin ba togimin biap gitan kamko ka·anggen, department, environment-ko chelchaken kamko ka·anggen. Indake High Court-ni changgipingipa hearing-ona kamko dondipatna raiko on·ataio, Tynsong indine aganaha, “a·dok sorkari, court-na chu·gimik paper ba lekkarangko on·manaha.”
Project-ni kamo ka·sinengani gimin janapatengon, “7-8 percent-ni gitasan kamko matchotkuenga, lockdown-ni gimin kam ka·aniko dondipatanina project-ni kamo ka·sinenga, ine aganaha.
“Obosta namangkahaode kamko ta·rakatgen. Unbaksan company-ba dongimin somoiko kamko matchotna manchienga, ineba Tynsong aganaha.
Indake ong·engon Mylliem-ni MDC, Ronnie V Lyngdoh-ba project-na chakataha. Traffic-ni a·sel ua jolo donggipa manderang adita neng·nikako chagrongna gita nanga ine aganataha.
Beben bang·gija gimaani soknaba donga indiba ia project-ara mikangchi jolni mandena namgni ong·skagen ineba talataha.
Uandake Lyngdoh, Chief Minister Conrad Sangma-ko bol bipangko den·anio ong·gija kattako aganatanina matnangaha. Project-o bang·a departmentrangan melie kam ka·enga ong·ode maidake Chief Minister, project-ni gimin u·ija, ine sing·ataha.
