SHILLONG: Meghalaya Energy Corporation Limited (MeECL)-o bijolini gita noksan ong·engani a·sel a·dokna bang·en kajinako man·anio gimana gita nangenga ine a·dokni opposition Congress dol parakatenba, MeECL-o noksan ong·aniko namatchina NPP-chi dilenggipa MDA sorkario dabiangaha.
Byrnihat-ni karkanarangko chalaienggipa biaprango jaantian lak 6-oni lak 8 unit-rangni gita bijoli noksan ong·na nangenga ine MeECL-ni chairman aro managing director (CMD)-ni talatgipa kattarangni gimin janapatengon, iandake noksan ong·aniko namatna gita Power department, ta·raken ja·kuko de·na nanga ine Congress dolni ku·wattimgipa Zenith Sangma parakataha.
“Chinga a·dokni namgnina chanchigipa opposition dol ong·e MeECL-ko chalaisretani bidingo changni chang ku·rang on·enga aro MeECL-ni kamrangko namdapatna gita agan-ku·pattianirangkoba on·engachim indiba sorkari ia kamrangko namdapatna gisiko nangjaenga,” ine Sangma parakataha.
MeECL-o kam ka·e neng·takgimin manderangna, uamangni man·gnirangko ta·raken on·china gitaba Congress dolni dilgipa, MDA sorkariko didiangaha.
“MeECL-o kam ka·e neng·takgimin manderangna batanggimin jagittamna pension-rangko on·kujaengani a·sel neng·nikanirangko man·tokengaha. Uni gimin kamoni neng·takgimin manderangna ta·raken uamangni man·na nangenggipa pension-rangko on·china chinga sorkariko didienga,” ine Zenith Sangma parakataha.
Batanggimin April aro May jani pension-rangko on·kujaengani gimin MeECL Pensioners Association (MPA), da·al Sombar salni bako Shillong songjinmani Lumjingshai-o donggipa MeECL-ni office headquarter-o jingjengatna tik ka·angahachim.
MPA-ni parakatani gitade, uamangni man·na nangkuenggipa pension-rangko on·china uamang changni chang MeECL-ni CMD-ko agangrikahaoba da·onan uamangni pension-rangko on·ani bidingo maming ku·rachakanirangko on·kujaengachim.
