TURA: Tura centre-o Meghalaya Teachers Eligibility Test (MTET)-ko pass ka·e dongenggipa skigiparangoni bang·akon kamo ra·kujaenga ine MTET-ko pass ka·gimin skigiparang suk ong·gijaniko parakattokaha.
Skigiparangni u·iatani gitade, Tura division-o govt LP school-ni sak 114 assistant teacher-ni kamna advertisement ba u·iataniko on·anio janapahachim indiba adita salrangna skang ong·atanggipa interview-ode MTET-ko pass ka·e dongenggipa sak 159 skigiparangoni sak 96 skigiparangkosan ia kamrangna seokaiahachim.
Garo Hills-ni gipin district ba a·jarangode MTET-ko pass ka·e interview-ko ra·gipa pilak candidate-rangkon skigipani kamna ra·aha ineba Tura-ni skigiparang parakataha.
Gipin a·jarango MTET-ko pass ka·gipa skigiparang chu·ongjaengani a·sel bang·bata skulrangkon chipe dontokna nangengoba Tura centre-ni MTET pass ka·gimin skigiparangkode gipin a·jarango ba division-rango dosgastorangko galna on·jaenga ineba Tura centre-ni MTET pass ka·gimin skigiparang suk ong·gijaniko parakataha.
“Sorkarini advertisement-ko on·aniode MTET-ko pass ka·gimin skigiparang, a·dokni gipin a·jarango ba division-rango dorgasto galna man·jawa ine maming janapani dongjachim. Uni gimin ching gita MTET-ko pass ka·eba iandake gipin a·jarango ba division-rango kamna dorgasto galna man·jagenchim ong·ode skigiparangna namen kragijani ong·enga,” ine Tura centre-ni skigiparang parakataha.
Garo Hills-ni gipin a·jarangode MTET pass ka·gijagipa Non-Govt LP School-ni skigiparangkoba kamo rakkienga indiba Tura centre-ni MTET pass ka·gimin skigiparangde gipin a·ja ba division-ni Non-Govt LP School-mangmangoba cholko man·pajaenga ineba skigiparang suk ong·gijaniko parakataha.
“National Council for Teachers Education (NCTE) Act, Right To Education (RTE) Act 2009 aro gipin niamrango pangchake kamko ka·na kragipa aro 2011 bilsi dipetan Govt LP skulrango skienggiparang bang·en MTET-ko pass ka·e dongenggiparang dongachim indiba ia skigiparangko sorkari kamo ra·gija nichanggalenga. Uni gimin chatro chatrirangni namgnina, chinga Tura centre-o MTET-ko pass ka·e dongenggipa skigiparang, chingni neng·nikanirangko ma·sichake bangki dongenggipa kamrangna interview-ko ong·atchina a·dok sorkari aro Education department-ko didienga,” ine Tura centre-ni skigiparang parakataha.